Links sind alle Fotos dieser Fahrt zu sehen, oben die Details zu den Verbindungen. Ein rennendes Piktogram bedeutet, dass ich für das betreffende Foto aus dem Zug ausgestiegen bin, das Selfie geschossen habe und dann im gleichen Zug weiter gefahren bin. Ein Klick auf den Bahnhof führt zur Übersichtsseite der Station, wo es gegebenenfalls weitere Bilder vom gleichen Ort zu sehen gibt. Unten gibt es einen Text zur Reise, sofern mir etwas Interessantes in den Sinn gekommen ist.

En Troum

I ha mol mitemene Moritz zäme gschafft. Er heisst nöd würkli so, aber das isch jo eigentli egal. Er isch nöd umbedingt min Lieblings-Mitarbeiter gsii, vor allem will sini Usgangs-Gwohnheite nöd grad förderlich für sini Zueverlässigkeit gsii sind, was aber ken Grund isch nöd ihzwillige, woner mi um Hilf bittet.

Es sigi super dringend. Er verzellt, dass er in de Nacht öppis ahgfahre hegi, und me mös das jetzt zum Verschwinde bringe. Öppis cha no villes heisse, und i gsehn uns scho irgendwelchi Strooftate vertusche. Aber me cha sichs jo mol ahluege.

Mir nemed also s Auto und fahred neime ane. Die gsuechti Stell isch ufmene Kreisel. Es isch so eine wo zwei Kreis zämegschmulze sind, so dass d Strooss en Verlauf nimmt, wie wenn me emene Null en Gurt ahlegge wür und zuezieht.

Offesichtlich isch de Kreisel aber nüm in Betrieb, will Bäum wachset zmitst uf de Strooss und Laub bedeckt de Asphalt. Es gseht so chli us wie wenn me e alti Rennstrecki bsuecht, wo scho siit Johrzähnte nüm benutzt wird, so dass sich d Natur s Gländ und d Strecki selber scho wider het chönne zrügg erobere.

Es isch mr also schleierhaft, wie de Moritz doh het chöne so schnell fahre, dass me öppisem nöd het chönne uswiiche. Aber tatsächlich zeigt er zu Öppisem wo am Bode ligt. Bim nööchercho isches en Pangolin¹, wo aber scho so öppe d Grössi vomene Krokodil het.

Womer nöchher chömed stellt sich use, dass es no läbt, und es rennt devo. Es wirkt fasch so, als hegs sich an beidne Vorderbei verletzt, aber es isch nöd guet z erkenne, wills halt uf de Hinderbei am wegrenne isch und uns de panzereti Rügge zue dreit het.

De ehemalig Kreisel isch anschiinend e Art Waldspielplatz, will plötzli hets einigi Chinder ume wo am spile sind. De Pangolin rämplet einigi Chinder ah. Di ahwesende Familie fanget ah wegzrenne und au de Moritz und ich ergriifed d Flucht.

S Tier nimmt d Verfolgig uf und verwütscht es Chind, wo denn umgheit und de Pangolin ligt uf es druf. Noch es bitseli Zögere trei i mi um zum em Chind go helfe. Aber woni nöcher chum gsehni das es am lache isch. S Tier isch nämli gar nöd am ahgriife, sondern umarmt s Chind, und es ich au nöd würkli en Pangolin sondern es läbigs Stofftier wo meh oder weniger usemene Wuschel-Bolle mit Ärm bestoht.

Woni nebe drah stand loht s Tier vom Chind ab und stürzt sich uf mich, i ghei um, aber s Laub isch ganz weich. S Kuschel-Monschter druckt mi ganz fesch und i mues säge, es isch worschindli di bescht Umarmig woni je übercho ha.

¹ En Pangolin (odr au Schuppetier) isches Tier wo in Asie und Afrika vorchunt. Es het Internet-Berüehmtheit erlangt, will wenns uf de Hinderbei stoht s d Vorderchralle so zäme hebt, dass es usgseht als würds nervös mit emene unsichtbare Huet spile, wills nach öppis will frooge. Aber si sind au süsch irgendwie no härzig.

Vorheriger Text

Alle Texte

Nächster Text