Links sind alle Fotos dieser Fahrt zu sehen, oben die Details zu den Verbindungen. Ein rennendes Piktogram bedeutet, dass ich für das betreffende Foto aus dem Zug ausgestiegen bin, das Selfie geschossen habe und dann im gleichen Zug weiter gefahren bin. Ein Klick auf den Bahnhof führt zur Übersichtsseite der Station, wo es gegebenenfalls weitere Bilder vom gleichen Ort zu sehen gibt. Unten gibt es einen Text zur Reise, sofern mir etwas Interessantes in den Sinn gekommen ist.

Alles Uusstiige!

Me seit, s Folgende sigi tatsächlich passiert. I wüsst nöd wem, will mir passiert sowas sicher nöd. D Gschicht fangt ah mitemene Bahnersatz-Bus, wo natürli langsamer isch als d Bahn, woner sött ersetze. Drum langts meischtens grad so nöd ufe Zug uf Bern. Usser wenn an de letschte paar Statione niemert ihstiigt und grad e grüeni Welle d Fahrt vereifacht. Genau das isch mir… Ehm, anschiinend öpperem passiert und die Person het sehr Freud gha und grad es paarne gschribe wie guet das jetzt grad klappet hegi.

De Zug fahrt also ab. Es isch nöd e Verbindig wo die Person oft nimmt, drum mues si sich fesch vorneh, nöd z vergesse in Olte umzstiige, was sünscht meischtens nöd nötig isch. Im Zug sitzend chömed di tiefgründige Gedanke, odr emel stell i mr das so vor, während me usem Fenschter luegt.

De Zug haltet ah. Me schreckt uf. Het me sich nöd gmerkt dasme mues umstiige? In dem Fall wär denn en Blick zur Destinations-Ahzeig ahbroocht. Und tatsächlich, det stoht nöd Bern, sondern Luzern.

En churze Moment würd me denn vilich überlegge, öbs nöd eh scho z spoot isch. Will es wär scho sehr peinlich ufzspringe und denn nüm use z cho, und denn widr wie en begossene Pudel zrugg in Wage z laufe. Uf de andere Siite wärs au mega müehsam uf Luzern go chere. Die Person würdi das denn vilich churz abwäge und sich für s probiere Usstiige entscheide.

Es fallt ere vilich sogar uf, dass das Peron nöd so usgseht wie die wos z Olte het. Aber me isch jo imene Zug wome süsch nöd isch, vilich haltet de au amene Peron wome süsch nöd haltet, oder zmindescht ganz wiit vorne wos no kes Dach und vill Lüüt het.

Obwohl die Person chli spoot isch, mues si d Türe no selber ufmache. Sehr komisch, dasses in Olte e Türe git, wo niemert het welle ih- odr usstiige. Me chönt also durchuus behaupte, dass die Person alli mögliche Hiiwiis gha het, dass das worschindli nöd de Bahnhof Olte isch.

Dusse stoht de Kondiktör. «Nomol Glück gha!», meint er amüsiert. Das wür die usstiigendi Person denn vilich animiere, möglichscht schnell chli weg z laufe. Wo si denn langsam aber sicher merkt, dases tatsächlich ken Zwiifel cha geh, dass das nöd Olte isch. I mein s Bahnhofsschild wo «Gelterkinden» druf stoht möst jo scho es eidütigs Indiz sii.

Me chönt eifach umchehre und widr ihstiige. Aber denn möst me widr an dem Kondiktör verbii. Und es isch eh nöd sicher dases no langet, und wenns nöd wür lange, würdet alli wo uf de richtige Siite dinne sitzed das gseh und sich drüber luschtig mache.

Dismol, jetzt wos besser wär z handle anstatt abzwarte, langets nüm, de Zug fahrt ab. Wenigschtens hets en Kiosk, dänkt sich die Person, wo ihren Mage chnurret. Usser das s Geld nüm für s Brötli und s Trinke langet.

Was eim nöd alles passiere cha. Also nöd mir.

Warning: Undefined array key 8 in /home/clients/6f9c1321310faa49d64a7a2856709eda/sites/bhf.stationstheater.ch/bin/textablauf.php on line 33

Vorheriger Text

Alle Texte